|
المتهم بمذبحة
بني مزار:كنت متأكد من البراءة وأتمني أن يصدقني أهل البلد
فرحته بالبراءة زادت من ذهوله..
عيناه الشاردتان لازالتا تنظران في كل اتجاه كأنه لايري أحدا.. ينظر إلي أفراد
أسرته وكأنه لايصدق بينهم مرة أخري بعد 9 أشهر قضاها في الحبس كلماته قليلة
لكنها معبرة.. فرحة أبيه وأمه واخوته والمتعاطفين معه لاتوصف!.. علي الناحية الأخري
هناك أحزان في بيوت المجني عليهم وخوف ورعب يسيطران علي معظم أبناء القرية والقري
المجاورة.. الكل يتساءل طالما أن محمد خرج بالبراءة فمن ياتري الذي ارتكب تلك
المجزرة البشعة'؟!
أخبار الحوادث رصدت لحظات وصول محمد إلي بلدته عزبة شمس الدين والتقت أفراد أسرته
وأهالي المجني عليهم.
حلاوة البراءة بعد الاتهام لحظات لايستطيع وصفها الا من تحمل ظلم الاتهام وعايش بعد
ذلك أفراح البراءة.. لحظات ان وصفت بأنها جميلة فهذا قد لايعبر ولايجسد ما بداخل
قلوب وصدور أهالي المتهم البريء محمد علي أحمد عبداللطيف وخصوصا داخل قلبه هو!
الحاكم عادل
كفاية اني بقيت وسط الناس تاني.. واترميت في حضن أمي مرة أخري بعد حرمان 9 أشهر
وأنا في زنزانة وحدي.. هكذا بدأ محمد كلامه وهو يبتسم في تفاؤل وفرح شديدين وكما
تعبر ملامح وجهه يقول محمد علي أحمد عبداللطيف المتهم بارتكاب المجزرة البشعة ببني
مزار والتي راح ضحيتها عشرة أفراد من ثلاثة بيوت متفرقة في شارع واحد بعزبة شمس
الدين وأضاف محمد.. أنا كنت متوقع البراءة ومتأكد منها لأني ما عملتش حاجة واستحالة
إني أقتل أي شخص وبدون سبب إزاي؟! ودول أهل بلدي ومعارفنا وبعدين أنا كنت واثق أن
القضاء عندنا بخير ولن ينساق وراء أي كلام.. القضاة ناقشوا كل شيء وحققوا معايا
أكثر من مرة.. وأنا بريء.. وزي ما قال حضرة القاضي ان قلبه مطمئن للبراءة وده معناه
أن الحاكم عادل وما بيظلمش.
لم أعترف!
سألنا محمد كيف قضيت 9 شهور في محبسك مع احساسك بالبراءة؟!
أنا حطوني لوحدي في سجن انفرادي وما كنتش بأشوف الخلا برة الزنزانة إلا ساعة
الأكل.. ولما طلبت أكون مع المساجين رفضوا وقالوا لي: أنت خطر يمكن تقتل لك عشرة
مساجين كمان!
قلت له: كيف أخذوك للقسم منذ شهور؟!
أجاب محمد وهو شارد.. أبدا أنا كنت في بيتنا ولقينا الشرطة كلها فوق رأسنا أخدوني
أنا وأمي وأبويا واخوتي وما اعرفش بعد كده إلا بأسبوعين انهم سابوا باقي عيلتي..
كنت واثق من براءتك مع انك اعترفت بالقتل.. إزاي؟!
يا أستاذ أنا ما اعترفتش الا لما زاد علي الضغط والتعذيب وما قدرتش أتحمل.. كنت
باحس بجسمي كله بيتنفض وكنت باسورق وأموت عشرين مرة في اليوم.. حاولت أنقذ نفسي
وقلت أيوة أنا اللي عملت كده زي ما قالوا لي أنت اللي عملت مش كدة يامحمد!
أجمل اللحظات!
انت دلوقت وسط أهلك وفي بيتكم فرحان ولا خايف؟!
دي أحلي لحظات حياتي بعد لحظة نطق الحكم بالبراءة اني أرجع تاني وأبقي وسط عيلتي
وجماعتي وفي حضن أمي وأبويا واخواتي.. ده أنا كنت خلاص ها اتجنن وأنا محبوس لوحدي
وما باكلمش حد.. وبعدين أنا ها أخاف ليه.. أنا ما عملتش حاجة ومستحيل أكون أنا اللي
قتل كل الناس دول.. والله العظيم حرام.. وربنا يرحمهم ويرشد الحكومة عن اللي عمل
كده علشان القانون ياخد مجراه ويحكم علي اللي عمل العملة البشعة دي!..
بعد براءتك وخروجك من السجن هاتعمل إيه؟!
أبدا.. ها أعيش زي الناس بس ياريت أهل بلدي اللي همه أهلي يثقوا ويتأكدوا اني
بريء.. والقاضي برأني من القتل ده الحاكم عادل هوه ها يجاملني ويظلمهم؟!
نفسي أتجوز!
يواصل محمد رغم شروده حواره معنا فيقول.. أنا دلوقت.. آه.. نفسي أتجوز بنت الحلال..
بس فكرك فين هي اللي ممكن تتجوزني؟!.. نفسي يكون لي أولاد وأربيهم أحسن تربية زي
أبويا ما رباني وأعلمهم أعلي تعليم.. ونفسي قبل كل ده في وظيفة حلوة علشان أرد
لأبويا واخواتي جميلهم وتعبهم علشاني واللي شافوه خصوصا في التسعة شهور اللي فاتت..
ونفسي الناس يبصوا لينا باعتبارنا منهم وهمه مننا علشان أنا وأهلي اتعذبنا كثير
وأنا بريء ما عملتش حاجة..
أسرة محمد:
إبننا بريء وربنا أظهر الحق علي لسان القاضي!
لم تجد تعبيرا سوي رفع يديها للسماء.. وتساقطت دموعها وهي تري ابنها محمد يدخل
المنزل عليها.. إنها الحاجة زينب محمد عرابي والدة البريء التي قالت لأخبار
الحوادث: مافيش أحلي من النهاردة اليوم اللي ظهر فيه الحق وابني بريء فليحيا
العدل!.. 9 شهور يامحمد تغيبهم عن أمك يا ولدي.. لكن معلش ما كانش بيدك ياضنايا..
وأخذته في حضنها ودموع الفرح تتساقط علي كتفي محمد الحمد لله.. ربنا أظهر الحق علي
ايدين القاضي العادل والمحامين الله يرحمه المستشار رأفت عبدالحميد قال لي: ما
تخافيش إبنك بريء يازينب خللي إيمانك في الله كبير.. وفعلا ربنا ما سابناش وكان في
عوننا وصبرنا ع الأيام السواد اللي فاتت.. ياناس حد فيكم يصدق ان ابني محمد الطيب
الغلبان ده يقتل فرخة؟! ده ولدي وأنا عرفاه صافي وحنين زي بحر النيل إن ما كانش
بيدي ما بياخدش..
وسألناها كيف سمعت واستقبلت خبر براءة إبنها قالت احنا من يوم الجلسات اللي فاتت
وحبسونا في غرفة لوحدينا قال خايفين علينا الحاج والده قال لي بلاش نروح احنا
ونتبهدل جلسة النطق بالحكم واللي يعمله ربنا هانرضي به وبقيت في البيت في عزبة
أبوحجر تبع منشية القيس.. لغاية ما اتصل ابني الثاني وقال لأبوه مبروك يابا.. محمد
براءة!.. كبرنا وهللنا وبقيت أسعد مخلوق علي وش الأرض والحمدلله والشكر لله وبعدين
الشكر لطلعت بيه تقصد طلعت السادات وفريق المحامين الذين
تبرعوا بالدفاع عن محمد بعد أن رفض كثير من محامي المنيا الدفاع عنه خوفا
من الانتقام.قبل كل شيء مهما اتكلمنا
وقلنا مش ها
الحكم بالبراءة جعلنا نموت من الخوف!
فرح هناك في عزبة أبوحجر التابعة لقرية والقيس حيث يقيم محمد الآن مع أسرته في
ضيافة أحد الأعيان.. ورعب وحزن هنا في عزبة شمس الدين القرية التي وقعت فيها
المذبحة خاصة بين أهالي الضحايا.. الكل هنا خابت توقعاتهم كما يقول علي السيد محمود
22 عاما كنت في الجيش وأبويا وأمي وأخويا وأختي راحوا في الحادث والدي السيد محمود
محمد ووالدتي صباح علي عبدالوهاب وأحمد وفاطمة اخواني.. وساعة النطق بالحكم اندبحنا
كنا متوقعين اعدام محمد علي واذا كان محمد قتل 10 بس فالحكم دبح 7 آلاف واحد همه
أهالي القرية كلنا خايفين لأنه بعدما أتأكدنا ان محمد هو القاتل 100 % اتحطينا تاني
في دوامة يبقي مين اللي عمل المدبحة دي؟!: أنا عن نفسي مقتنع مليون في الميه أن
محمد هو القاتل واحنا مش ها نسكت ها نطعن علي الحكم.. ولو ما اخدناش حقنا بكره..
احنا نعرف نتصرف!
ذبحونا مرتين!
اسمها لطيفة أحمد بكر شقيقة المرحوم يحيي أحمد ضحية المذبحة هو وزوجته نعمات
وأبناؤه أسماء ومحمود وعلي وأخويا يحيي كان أحسن بني أدم كان أخويا وأبويا وصاحبي
وهو اللي قام بتربيتنا لأن والدي رجل كبير والحكم ببراءة المجرم محمد ده يعلمه به
ربنا وأنا ما أعرفش ليه المحكمة ما أخدتش بكلام الشاهد الوحيد محمود محمد عبدالواحد
وليه اقتنع بكلام طلعت السادات بأن دي عصابة هي اللي بتبيع الأعضاء البشرية في
اسرائيل.. اليوم ده بس اللي هوه يوم النطق بالحكم حسيت إننا بندبح تاني زي ما دبحوا
أخويا والضحايا الله يرحم الجميع لكننا مش ها نسكت وفيه طعن واستئناف وأملي في الله
كبير اننا مش ها ننظلم تاني ولا عايزينا ناخد تارنا بايدينا لما الحكومة مش ها تاخد
لنا حقنا؟!
أما شقيقها جمال أحمد بكر 42 سنة وشقيق الضحية يحيي أحمد بكر فيقول.. كلنا تأكدنا
من الأول أن محمد هوه اللي عملها علشان هوه قام قبل المدبحة دي ومن سنين بيعمل
كده.. أنه قام بالسطو علي منزل بنت خالي الساعة الثانية بعد منتصف الليل وكان في
يده سكين وأحنا اللي أمسكناه ووقفناه عن الشر.. وعملنا قعدة عرفية وأخذنا عليه
ايصالات أمانة علشان ما يعملش كدة تاني! وبخصوص الحكم يقول جمال... حكم القاضي من
حقنا نعارضه بالقانون وها نطعن فيه بالقانون.. ومصير الحقيقة تظهر وتبان وساعتها بس
قلبنا يرتاح ويرتاح أهالي القرية واللي حوالينا من الخوف والرعب اللي الناس عايشين
فيه من 9 شهور.. ولسه!
خروجه يمثل خطرا علي الجميع.. نحن نناشد النائب العام بسرعة اجراءات الطعن في الحكم
لاعادة محاكمة الجاني مرة أخري حتي ترتاح قلوبنا هذا ما قاله أبوبكر عبدالحميد شمس
الدين شقيق المرحوم طه عبدالحميد شمس الدين وأضاف كلنا في حزن أكبر خاصة بعد تبرئة
المحكمة للسفاح اللي قتل ناس مالهمش ذنب ودول في حكم الشهداء لأنهم نائمون لابيهم
ولا عليهم.. وكلنا متأكدون أن هوه اللي قتل..
وكما يقول عبدالموجود علي محمد 63 عاما.. براءة محمد عملت رجة كبيرة في البلد أكثر
من يوم الحادث.. الناس خايفة ومرعوبين طيب لما محمد براءة يبقي بصحيح أن فيه عصابة
بتتاجر في الأعضاء البشرية.. الكل خايف وقلقان.. والناس بتسأل طيب ليه المحكمة ما
اخدش بكلام الشاهد أحمد سيد عبدالعظيم لما قال انه شاف محمد وهو داخل للشارع المؤدي
لبيتهم وأكد انه شاف الدم علي جلابيته؟!
عصام عزت شمس الدين يقول: الاعدام هو مطلب أهالي شمس الدين وأهالي بني مزار كلها..
علشان كده علي محمد عبداللطيف وأسرته أن يرحلوا بعيدا عن مركز بني مزار كله علشان
الناس مش هاتسكت لأنه لو كان أخذ اعدام كانت الناس ارتاحوا وقلوبهم بردت شوية علي
ضحاياهم.. ويوم الحادث أنا كنت نايم وفوجئت بخبطات الشرطة علي باب بيتي وكانت
الساعة الخامسة صباحا في الفجر يعني.. وقالوا لي ان فيه عائلات مقتولة في بلدك
ياعمدة (علي فكرة أنا مرشح للعمودية وسأحصل عليها بإذن الله) المهم لبست هدومي
بسرعة ومشيت معاهم ودخلنا علي بيت المرحوم طه وجدناه هوه وأمه مقتولين وبعدها
المرحوم سيد وزوجته وأولاده ورحنا بيت المرحوم يحيي وزوجته وأولاده.. من هول
المناظر اللي شفناها أنا وأهل البلد اتمنينا الاعدام لمحمد لكن ده مش شغلنا ده شغل
القاضي والمحكمة.. لكني أطالب محمد وأسرته بالاختفاء عن أعين الناس.
بقية أهالي القرية والقري المجاورة لايتحدثون فيما بينهم إلا عن هذه القضية
لكلماتهم الهامسة فيما بينهم تعكس خوفا وقلقا كبيرين فالمجزرة التي وقعت أحداثها
منذ 9 شهور لم تفارق عيون ولا قلوب الناس هنا في عزبة شمس الدين والقيس وأبوحجر
ومعظم مراكز محافظة المنيا.. لأنه اذا كان الحكم ببراءة محمد قد أسعد أسرته وأقاربه
كثيرا إلا أنه جدد الأحزان في قلوب أهالي الضحايا وأيضا مارد الخوف داخل بقية
الأهالي وكما يقولون اذا كان محمد بريئا... فليس أمامنا سوي التصديق أن عصابات
البحث عن الآثار هي التي فعلت ذلك وربما تفعلها مرات أخري من يدري.. الكل يقول بعد
أن يطمئنوا علي بعضهم كل صباح: الحمد لله عشنا النهاردة
|
